Mielieboere kan ál meer na sojabone draai

’nWitwarm onderwerp tans in die saaibedryf is die verskuiwing van mielieverbouing na sojaboonverbouing. Daar is verskeie redes daarvoor, waarvan produksiekoste die grootste een is. Die hoë sojaboonprys lok ook mielieboere wat sojabone as ’n wisselbougewas verbou, om hul sojaboonaanplantings uit te brei.

Dit oorreed ook ander boere om dié gewas vir die eerste keer te plant. Daarby het die weer die afgelope seisoen bygedra om groei in sojaboonverbouing te versnel. Daar is egter ’n paar strikke wat boere moet vermy indien hulle besluit om sojabone te plant.

DUIDELIKE GROEI

Mnr. Corné Louw, hoof van toegepaste ekonomie en lededienste by Graan SA, sê die afgelope seisoen het ’n rekordsojaboonoes opgelewer.

“Daar is nog nooit so baie sojabone (in Suid-Afrika) geproduseer nie. Die oesskattingskomitee beraam dat boere meer as 2,1 miljoen ton geoes het. Die bestaande rekord is die vorige seisoen se 1,9 miljoen ton. Dit wys die groeifase waarin die sojaboonbedryf is.”