DIE KABELS WAT ONS BIND
DIT kon kwalik op ’n slegter tyd gebeur het. Ten minste het ons die internet om ons deur die inperking te dra, het baie mense verlig gesug toe pres. Cyril Ramaphosa aankondig almal moet drie weke by die huis bly.
Maar toe kom die waarskuwing van internetdiensverskaffers: Daar is “ondersese kabelprobleme” en ons kon daarom trae internet ervaar.
Ja, daar was wéér fout met die West African Cable System (WACS) en die South Atlantic Telecommunications 3 (SAT-3). Dié twee kabels help om Suid-Afrika met Europa, en so met die res van die wêreld, te verbind.
