IS JY IN BEHEER VAN JOU AFTREDE?
Voortgesette veranderinge aan die Suid-Afrikaanse arbeidsmark, toenemende werkloosheid en ekonomiese en maatskaplike faktore saai verwoesting met plaaslike beleggers se aftreeplanne.
Die bates van Suid-Afrikaners wat nou aftree, is weens die afgelope vyf jaar se gedempte beleggingsmark waarskynlik sowat 15% minder werd as wat dit in normale beleggingsomstandighede sou wees, sê Deane Moore, uitvoerende hoof van die aftree-inkomstespesialis JustSA. Dit is gegrond op ’n gemiddelde opbrengs van 6,5% per jaar die afgelope vyf jaar in plaaslike gebalanseerde fondse.
“In normale beleggingsmarkte sou mense die verbruikersprysindeks (VPI) plus vyf persentasiepunte per jaar van gebalanseerde fondse verwag het,” sê hy. Met die verbruikersprysindeks die afgelope vyf jaar op sowat 5% per jaar beteken dit dat mense beleggingsopbrengs van 10% sou verwag het.
Die plaaslike aftreeomgewing het natuurlik ook die afgelope twee tot drie dekades grondliggend verander deurdat vastevoordeelfondse na vastebydraefondse oorgeskakel het. Dit plaas die risiko op fondslede en nie die maatskappy waarvoor hulle werk nie.
