GEVLEUELDE JAGTERS VAN DIE STEDE
Verlede maand het ek die kenmerke en vele interessanthede van uile, sperwers en valke as stads- en tuinbewoners bespreek. Sommige van hierdie roofvoëls (veral uile) word verwelkom in ons tuine en is geliefd onder Suid-Afrikaners. In hierdie afdeling vertel ek graag meer aangaande die majestueuse, kragtige arend, maar ook die ander (minder gewilde) kalante van ons roofvoëlspesies.
ARENDE
Arende is nie onbekend in Suid-Afrikaanse stede en dorpe nie. Plekke soos Kaapstad, Pretoria en Johannesburg se inwoners sien gereeld die koning van die arende, naamlik die witkruisarend, wat rustig as ’n paar oor woongebiede sweef. Die Roodepoortse Nasionale Botaniese Tuin se paar witkruisarende is beroemd en was die oorsaak van ernstige dispuut tussen bewaarders en ontwikkelaars wat met gierige oë alles wat ongeskonde is, in “mensneste” wil omskakel. So ook is daar die arendpaar bo Mountainview in Pretoria wat al, gewone tarentale, kransduiwe, wedvlugduiwe, likkewane en selfs huiskatte en kleiner honde. Gewoonlik sal die witkruise amper net dassies vang, maar hulle word gedwing om prooi te vang wat beskikbaar is as die dassies verminder. Witkruisarende is baie groot en magtige voëls met dodelike kloue. Enige iemand wat al gesien het hoe hulle jag, sal weet dat die prooi onmiddellik gedood word met die slag en die kragtige kloue.
