正爿彼个光點是 太陽系 內底上大粒 ê 石頭。伊是比咱所有知影 ê 小行星、衛星、kah 彗核 閣較大粒。伊嘛比 咱太陽系內底所有 ê 岩石行星 閣較大。這粒石頭大甲伊 ê 重力會當 kā 伊家己搝做一粒球，而且會當 kā 較重 ê 氣體搝 tiàm 伊 ê 表面。（伊以前是 咱所知影上大粒 ê 岩石行星。毋過 最近咱有揣著 足濟粒 踅別粒恆星咧行 ê 閣較大粒、實密 ê 行星。）這張 叫做「藍色光點」ê 相片是 航海家 1 號太空船 tī 1990 年代 ùi 外 太陽系 翕--ê 太空大石頭。Ùi 今仔日開始，這粒石頭會開始新一輾 ê 公轉。伊這馬差不多欲踅伊 ê 母恆星 第 50 億擺矣，逐擺攏愛自轉超過 350 擺。這粒石頭就叫做 地球！咱祝面頂 ê 居民 新曆 年 快樂！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230101/ 影像：NASA, Voyager 1 號太空船 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230101.html Powered by Firstory Hosting