是啥物物件 tī 月食 ê 邊界產生這个藍色 ê 布邊？這个藍色布邊是真的，毋閣真歹看著。這是頂禮拜月食 ê 時陣，tī 中國 鹽城 用 HDR 技術翕著 ê 相片。這已經用數位處理 ê 方式 kā 月娘 ê 光度調整過矣，按呢 色彩 會較明顯。正爿下跤 ê 殕色 是 月娘 本底 ê 色，是直接反射太陽光 ê 色。倒爿面頂 ê 月娘無直接去予太陽光照著，因為去予 地球 ê 烏影 閘著 矣。毋閣太陽光迵過 地球厚厚 ê 大氣層 了後，雖然有較暗，嘛是有照著月娘。按呢去照著 ê 月娘是紅色 ê，咱 kā 叫做 血月。這 kah tī 地球看著 ê 紅色日落是仝款 ê 原因。因為空氣會 kā 大部份 ê 藍光 散射，賰 ê 看著 ê 就是紅色 ê。這个無四常 ê 藍色布邊 是別款原因。這个藍色是太陽光迵過高層 ê 地球大氣，遮 ê 紅光 去予臭氧吸收去矣，煞賰 藍光。明仔載有 日全食，毋閣真不幸，干焦 tī 地球南極 附近才 看有。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211201/ 影像：Angel Yu 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211201.html Powered by Firstory Hosting