Wol
Hy was ’n peuter toe die wol-boom in die 1950’s die lot van talle skaapboere verbeter het. Sewe dekades later trek die bedryf swaar, maar Micky Liddell van die plaas Didima in die distrik Adelaide in die Oos-Kaap het met ’n geleidelike maar toegespitste teelbenadering uitsonderlike pryse op ’n lustelose mark behaal.
Op ’n onlangse wolveiling in Gqeberha het hy die hoogste prys van R233/kg vir drie bale van 14,5 mikron behaal, was hy op die lys van topvyf produseerders én sy gemiddelde skeersel het die eerste keer 16,5 mikron behaal – iets wat hy al vier dekades nastreef.
Micky se uitstekende en hoë pryse is alombekend in wolkringe, en van stilsit is daar nie sprake nie. “Die harde werk om die gehalte hoog te hou, begin nou eers.”
Gary Willows, skaap-en-wol-adviseur van BKB, gekwalifiseerde nasionale Merinobeoordelaar en jare lange vriend, skryf Micky se prestasies toe aan spesifieke teeldoelwitte en sy streng seleksieproses. “Micky het ’n fenomenale fynwol-Merino geteel wat nie net funksioneel en goed gebalanseerd is nie, maar ook uitstekend aangepas is vir die gemengde suurveld van die Winterberg. Dit is ’n voorreg om elke keer te sien hoe goed die eindproduk op wolveilings vaar.”
Fynwol in sy are
Albei Micky se oupas en sy pa het met fynwolskape geboer. Sy oupa Liddell, wat by Harrismith geboer het, het onder meer in 1921 ’n sertifikaat van uitnemendheid van die Britse Ryk gekry vir sy fynwol.
