DIE derde nasionale verslag oor die status en bestuur van biologiese indringers in Suid-Afrika waarsku dat sekere spesies landbouproduktiwiteit kwaai kan knou.
Dié omvattende verslag deur die Suid-Afrikaanse nasionale biodiversiteitsinstituut (Sanbi) en die departement van wetenskap en innovasie se sentrum vir uitnemendheid in indringerbiologie, is saamgestel uit verskeie navorsingstukke en moniteringsverslae, en waarsku dat ’n beter benadering tot hulpbronbestuur nodig is om indringers behoorlik die hoof te bied.
’n Studie oor die finansiële impak van indringerspesies in Suid-Afrika, gegrond op data wat strek van 1960 tot 2023, beraam die koste aan die ekonomie op R52,7 miljard. Tog is slegs R9,6 miljard aan indringerbestuur bestee.
Plantindringers het die meeste bygedra tot verliese én bestuurskoste; wattels het byvoorbeeld 17% van alle bestuurskoste beloop en 70% van die skadekoste veroorsaak.
Wetenskaplike beramings toon egter dat skade én bestuurskoste baie groter was as wat gerapporteer is.
