REEDS as ’n seuntjie, toe Tariq Moosa buite in die sand met sy Matchboxkarretjies gespeel het, het hy daarvan gedroom om eendag sy eie kar te hê.
Daardie dag het eindelik aangebreek. Maar dit het lang ure van harde werk as kelner en winkelrakpakker gekos, en hy moes elke liewe ekstra sent spaar.
Sy eerste kar was wel ’n skedonk, ’n ou Mini Cooper wat skaars padwaardig was, maar hy het nog nooit weggeskram van harde werk nie, veral nie as dit kom by enigiets met wiele en ’n enjin nie.
En nou het sy passie vir motors ook sy brood en botter geword – en die pad tot by internasionale blootstelling.
Tariq (38) is onlangs aangewys as een van die topvyf-restoureerders in die wêreld by die Gravity Show
