Met die gemiddelde planter kan ’n boer wat 1 000 hektaar beplant, in die algemeen net reken op ’n inkomste uit 780 ha – en dat 220 ha van die 1 000 ha geen inkomste gaan lewer nie. Dit is omdat die deursneeplanter net 78% doeltreffend is, sê Lourens Janse van Rensburg, ’n presisielandboukenner van Elim Kunsmis, nadat hy aan navorsing deelgeneem het wat 1 500 planters van verskillende soorte en fabrikate vir optimale werkverrigting in ’n presisielandboustelsel geëvalueer het.
Lourens het op die onlangse mielie-en-sojakongres wat by Sun City in Noordwes deur Elim Kunsmis en Landbouweekblad aangebied is, sy kennis aan nagenoeg 1 100 graanboere van reg oor Suid-Afrika oorgedra.
Hy het boere verseker dit is nie te moeilik om die algemene foute op planters te identifiseer en reg te maak nie, en dat doeltreffendheid sonder te veel sukkel tot 95% verbeter kan word.
Dink aan die pit
Lourens het gesê boere moet hul aanvanklike aandag vanaf hektare verskuif na die individuele pit wanneer hulle aanplantings doen, want dit is wat vir die