#1 TEËL DIT!
WIE Kearnon en Kate O’Moloney
WAAR Bantrybaai, Kaapstad
Teëls bly steeds ’n gunsteling in kontemporêre badkamers, behalwe dat die idee om al vier mure te teël, lankal nie meer geld nie. Deesdae word net een muur (of hoogstens twee) geteël – in die stort of as trendy spatvlak agter die wasbak. Teëls is ook nie meer “plat” en “leweloos” nie, maar kom in ’n verskeidenheid teksture en patrone.
Hoewel Kearnon en Kate ’n eenvoudige, minimalistiese ontwerp in hul en suite wou hê wat nie die aandag van die panoramiese see-uitsig sou aftrek nie, skep hul treffende smaraggroen teëlkeuse ’n besonderse fokuspunt in die instapstort. Die ingevoerde sementteëls van Villa Lagoon Tile in die VSA met hul geometriese “vierkantgolf”-reliëf gee diepte en tekstuur aan die stort se mure sowel as die vloer. En omdat dit die venster gedeeltelik omraam, word die oog na die indrukwekkende uitsig gelei.
Kopertoebehore wat die paartjie stuk vir stuk by John Brass Plumbing in Soutrivier gekoop het, bring ’n tikkie ouwêreldse weelde in. Die pype en krane verskil almal, wat die idee van “perfekte imperfeksie” onderstreep.
