Gaan dit oor ontwikkeling of oor meer beheer, wat in ’n groot mate ontwikkeling in ’n belowende groeisektor kan doodwurg? ’n Nuwe weergawe van die akwakultuur-ontwikkelingswetsontwerp wat in 2018 aan die parlement voorgelê en in 2020 onttrek is, is onlangs aan belanghebbendes in die akwakultuurwaardeketting versprei vir bespreking voor dit in die Staatskoerant afgekondig sal word.
Belanghebbendes in die bedryf meen die departement van bosbou, visserye en omgewingsake het nie die kwessies wat uit bedryfskringe geopper is sedert die eerste weergawe van dié wetgewing in 2016 die lig gesien het, in ag geneem nie.
Hulle meen ook die nuutste konsep van die wetsontwerp doen min om ontwikkeling te bewerkstellig en streef eerder net daarna om die staat se regulatoriese houvas op akwakultuurbedrywighede te versterk.
Van die grootste vrae vir binnelandse visboere wat met spesies soos forel, baber en kurper boer, is waarom die departement boere wil dwing om te registreer en om lisensies en permitte aansoek te doen as dit vir geen ander landboubedryf voorgeskryf word nie. Boere se reg om met ’n produk van hul keuse te boer, is dus uitgelewer aan die oordeel van die departement. Geen ander landboubedryf word daaraan onderwerp nie, het mnr. Stephan van der Merwe opgemerk op ’n onlangse jaarvergadering van
