Bore Tech, ’n Amerikaanse maatskappy wat in 1997 sy deure geopen het, se produkte word al etlike jare in Suid-Afrika bemark. Inyathi Sporting Supplies, die invoerder en verspreider, het aan SA JAGTER/ HUNTER Bore Tech-skoonmaaktoerusting en -middels ge-gee om te toets.
SKOONMAAKSTOK
Eerste aan die beurt was Proof-Positive Bore Stix, ’n skoonmaakstok in ’n eie klas. Dit is ’n allemintige 125 cm lank – lank genoeg vir enige geweer se loop. Die harde rubberhandvatsel sit gemaklik in die hand, gly nie en draai om twee laers in die rondte, wat uiters belangrik is as die stok deur die loop gedruk word. Hierdie soort stokke sorg dat die skoonmaakskaar (jag) die groefdraadkontoere volg en nie daaroor “gly” nie.