WAAR IS ONS BABAS?
JARE lank het hulle gesmag na ’n kind van hul eie – en eindelik lyk dit toe of hul droom waar gaan word. ’n Swanger ma wil haar baba vir aanneming opgee, en daar is die gemoedsrus dat die proses deur ’n maatskaplike werker hanteer sal word.
Geld vir die aannemingsproses word betaal en babagoed gekoop. Maar dan kom die verskriklike nuus: Die baba is met geboorte of kort daarna oorlede.
Dit klink soos ’n nagmerrie, maar volgens verskeie egpare is dit presies wat met hulle gebeur het.
Dié verhale het een gemeenskaplike rolspeler, beweer hulle: ’n aannemingspesialis van Pretoria, Letitia van den Berg.
Een van die egpare, Irene (34) en Marco Engelbrecht (36) van Pretoria, beweer hul droom is twee keer deur Letitia verpletter – en glo sy het hulle om die bos gelei.
Toe die Engelbrechts hoor van nog ’n egpaar wat soortgelyke bewerings teen Letitia maak, het Irene ondersoek begin instel. Die bewerings teen Letitia is onlangs in Carte Blanche bespreek, met drie egpare se verhale ter stawing.
