DRAMA VAN DIE MILJOENE
’N TURKSE erfgenaam, ’n geslepe rekenmeester, ’n gevalle prins en twee skynbaar onskuldige prinsesse in ’n duistere gelddrama gewikkel. Welkom by die jongste skandaal wat die beleërde Huis van Windsor getref het, waar skaars ’n week deesdae sonder drama verbygaan.
Koningin Elizabeth is gewoonlik die een wat die publiek jammer kry as daar moeilikheid is – en met goeie rede. Die monarg het al heelwat teëspoed en verleentheid op haar 95-jarige skouers gedra.
Maar ’n mens kan nie anders as om ook ’n bietjie jammer te voel vir twee van haar kleindogters nie. Prinsesse Beatrice en Eugenie moes al baie skandes afweer en verwerk weens hul omstrede pa se twyfelagtige verhoudings met ongure karakters – en dit het pas weer gebeur.
