DIE WIND, MY HART SE PUNT
TOE ek klein was, het ek eenkeer ’n droom gehad waar ek hardloop, spring en begin om deur die lug te sweef. Daar was ’n afwesigheid van wind gewees. Dis dalk die beste manier om ’n lugballonrit te beskryf. Jy float net. Jy dryf eintlik in die lug. Jy voel nie die wind nie, want jy vlieg saam met die wind. Dit is doodstil en stabiel in die lug.
Jy hoor die voëltjies, jy hoor die verkeer op die grond. Jy sien die bome en die voëls vanuit ’n ander hoek. Dis anders as om met ’n helikopter of ’n vliegtuig te vlieg. Daar is nie turbulensie nie. Dit is tjoepstil daar bo.
