VLAKTEJAG –SÓ DOEN JY DIT
Vir die bosveldjagter kan vlaktejag nogal na ’n moeilike storie lyk. “Dis wanneer jy verder moet skiet as wat die gemiddelde mens kan sien en wanneer net die modernste gewere, teleskope en ander toerusting jou ’n kans op sukses bied”. So sou jy kon aflei indien jy aandag gee aan die gesprekke in wapenwinkels, op forums en rondom die braaivleisvure waar “deskundiges” lief is om raad uit te deel. In werklikheid is vlaktejag glad nie so ingewikkeld nie.
TOERUSTING
Kom ons begin by gewere en kalibers. Vir die doel van hierdie artikel gaan ek 300m as die maksimum skietafstand beskou en aanvaar dat hart/longskote geneem sal word. Ek is volkome bewus daarvan dat sommige jagters op dubbel die afstand, of selfs drie maal hierdie afstand, na wild skiet. Langafstandjag is egter ’n heel ander, gespesialiseerde vorm van jag. Kopskote op langer afstande vereis ook ’n stabiele rus, goeie toerusting en bogemiddelde skietvernuf.
’n Vlaktejaggeweer moet meer akkuraat wees as ’n bosveldgeweer maar benchrest-akkuraatheid is nie ’n vereiste nie. Enige geweer wat sy skote binne 1MOA kan groepeer op 300m (±75mm op 300) is akkuraat genoeg vir jag tot op daardie afstand. Hou
