KROKODILKASKENADES
Tussen ’n warboel papierwerk op my lessenaar het die brief gelê. Die netjiese koevert met die afsender se naam, Richard Christensen in vetdruk daarop, het belangrik gelyk. Die kleurvolle groen blomposseël was gestempel: Santa Ãna CA925, 23 Oktober 2018.
Nuuskierig het ek dit oopgemaak en geglimlag. Dit was met ’n outydse vulpen geskryf. Die skrywer, nou 82 jaar oud, het homself voorgestel as ’n vorige kliënt. Hy het my nuutste artikel in die Sports Afield-tydskrif gelees en besluit om die brief te skryf. Die inhoud daarvan was ’n herinnering aan ons krokodiljag in Zambië in die vroeë 1970’s...
Maar laat my by die begin begin, by my aangestelling as ’n nuweling-professionele jagter by Zambia Safaris. My kamp was in die Luangwa-vallei op ’n rivieroewer tussen die noordelike en suidelike Nasionale Parke, aangrensend aan die Munyamadzi-rivier aan die een kant. Die Munyamadzi-wildbewaringsarea was 3 300 vierkante kilometer groot. Die Groot Vyf was volop hier, tesame met groot getalle ander wildspesies soos puku, rooibok, koedoe en sebra. Wanneer die vlakte oorstroom is deur seisoenale reëns, het dit ’n parkagtige vloedvlakte geskep, oorskadu deur .
