Dipipimpi

By Pelepele Lerato Maketa

Mongwadi ke Pelepele Lerato Maketa.
Yena o belegwe motsaneng wa ga Moloi tikologong ya ga Sekhukhune,
Limpopo nageng ya Afrika Borwa.
Ditaba tša pukwana ye ke dipšhišamare, ke dipipimpi dipipa melomo.
Ga se dilokele ba matswalo a fase a go garošwa ke lefela gobane di tlatša pelo, tša feroša dibete gomme tša tšhološa megokgo.
Maina ao a šomisitšwego ka mo pukwaneng, ga se a nnete eupša ditaba tšeo di hlalošwago di hlagile, tše dingwe di bonwe ka mahlo mola tše dingwe e le dikanegelo ka bao di ba hlagetšego.

• Language: English
• Publisher: Pelepele Lerato Maketa
• Release date: Dec 10, 2021
• ISBN: 9781005799540

Book preview

Dipipimpi

Dipipimpi

Pelepele Lerato Maketa

Copyright © 2021 Pelepele Lerato Maketa

Published by Pelepele Lerato Maketa publishing at Smashwords

First edition 2021

All rights reserved. No part of this book may be reproduced or transmitted in any form or by any means, electronic or mechanical, including photocopying, recording or any information storage or retrieval system without permission from the copyright holder.

The Author has made every effort to trace and acknowledge sources/resources/individuals. In the event that any images/information have been incorrectly attributed or credited, the Author will be pleased to rectify these omissions at the earliest opportunity.

Pelepele Lerato Maketa

[e-mail]

Dipipimpi di pipa melomo

Ditaba tša pukwana ye ke dipšhišamare, ke dipipimpi dipipa melomo. Ga se dilokele ba matswalo a fase a go garošwa ke lefela gobane di tlatša pelo, tša feroša dibete gomme tša tšhološa megokgo. Maina ao a šomisitšwego ka mo pukwaneng, ga se a nnete eupša ditaba tšeo di hlalošwago di hlagile tše dingwe di bonwe ka mahlo mola tše dingwe e le dikanegelo ka bao di ba hlagetšego.

Ditebogo

Ditheto, ditebogo le ditumišo ka moka di lebišwa go Morena Modimo kage a re file bophelo, bohlale, bothakga le dikakanyo tšeo di swanetšego.

Mogakatša ditho tša ka; Dr. T. C Maketa, ke leboga maele le tlhohleletšo ya gore ke thalathale pukwana ye ka leleme la Sepedi.

Matsarogaphoka le dikgarebe tšeo Modimo a re šegofaditšego ka tšona; Lesedi, Kgomotšo, Fortune, Lesego, Lebogang le Lehumo ga ešita le mothuši wa lapa la rena, ke leboga thekgo ya lena ka moka.

Batswadi baka, ba bogadi bjaka le bana bešu ke leboga lerato la lena.

Moshopyadi ‘a Monare, ga ke kgone go hwetša mantšu a go leboga, o tla lebogwa ke Modimo.

Mongwadi

Mongwadi o belegwe tikologong ya ga Sekhukhune, motsaneng wa ga Moloi. Ke thakgaletswalo ka lapeng le legolo la mošate wa ba bina kwena ba Madihlaba. Ke Sebutsa Mphela Phatlana Mohlwara magatlo le Moshopyadi ‘a Monare.

Ge pukwana ye e tšweletšwa, o be a šomela lefapheng la tša maphelo.

Lenaneo la mateng

1.Lehlotlo La Tshipi

2. Mmapelo o Ja Serati

3. Bohloko Bja Pelo

4. Bogadi Bo Gadika Thotse, Bja Gadika Phodi Bo a Swa

5. Bagadikane

6. Monna Ke Thaka, o a Naba

7. Timamollo

8. Ga Di Bolelwe

9. Ga Di Bolelwe

10. Mmapelo o Ja Serati, Seripa Sa Bobedi

1

LEHLOTLO LA TSHIPI

"Tata wešo wa magodimong.

Leina la gago a le kgethwe,

mmušo wa gago a o tle, thato

ya gago ga e direge mo lefaseng

bjale kage e direga legodimong.

O re fe lehono bogobe bja rena bja

tšatši le lengwe le le lengwe.

O re swarele melato ya rena,

Bjalo kage re swarela bao ba re fošeditšego.

O seke wa re iša melekong empa o re phološe bobeng.

Gobane mmušo ke wa gago, maatla

le tumišo, ka go safelego

Amen"

Mokgekolo Moraka o phafošitšwe ke yona thapelo yeo ge e goeletšwa ke morwedie e lego Lopang, a bile a etšwa sethogothogo. Nnete ke gore Lopang o be a swerwe ke segateledi gomme a lora dilo tša go šiiša namana tša mmele. Ditoro tša yoo Lopang di be di tšwelela makga a mantši gomme ge e le segateledi sona o be a se fenya ka go goelela thapelo. Batswadi ba gagwe ba ile ba be ba tlelwa ke mogopolo wa go mo emaemiša le bo reatseba gore ba kgone go nyakišiša ditoro tšeo bjale e bego e le selo modiro gomme di mo hlokiša boroko. Pudi ya tsela e be e šetše e ba sebetše ka nkadingala yoo a bego a tumile gothwe ke matwetwe kudu mo tabeng ya ditoro. Batswadi ba Lopang ba ile ba napa ba thoma go beakanya mabaka gore e tlare ge bana ba sekolo ba fetša go ngwala ditlhahlobo tša gare ga ngwaga, ba kgopela hlogo ya sekolo se se phagamego sa Ithuteng go lokolla Lopang gore nke ba moiše kua ga ngaka Moshifa.

Masa a phela a hloka swele, le ile la fihla tšatši la marega gomme ya re e sale ka mahuba a banna, ba lapa la Moraka ba wela tsela ba leba ga Moshifa yoo a bego a tumile motseng ka moka ga ešita le dinaga mabapi. Kua gae go be go šetše mokgekolo mmelega tatago Lopang gore a šale a letile motse. Bana ba be ba lakalela go šala le yena kage a be a na le lebitšo ebile a rata go roma. Mosegare ka moka o be a tla hlwa a bitša yo le yola a nyaka meetse a gonwa go ba thekgwana ya motšoko. Ka nako tše dingwe, o be a tla go biletša gore o monyakele thekgwana yeo a bego a sa gopole gore o e beile kae kganthe e ka morabeng. Bana ba be ba šetše ba mo theile leina ba re ke koko maroma. Ba be ba mokgona ka go tšwa ka ntlong ka lebelo, ba šalane morago e le gore mokgekolo a gakanege a seke a tseba gore a bitše mang kage mahlo a gagwe le ona a be a šetše a iketše le go gola.

Ga Morena Moshifa go be go tsenwa e sale ka madimadima gore motho a se bonwe ge a tsena. Ka kgonthe ba rile ge ba tsena ba gahlanetšwa ke monna wa phaka tša mahuto wa tšitširipa wa go ema ka maoto a tloga a bontšha a tseba mošomo wa gagwe a bile a o rata. Aowa yoo e be e se yena nkadingala, e be e le moleta bele sa ngaka gore go se be le yo a motshwenyago ga ešita le ba go se lefele ditshwanelo tša bona ka nako, o be a ba rutela ba bantšhi a ba bontšha moo diphala di nwago meetse ntshe. Gape batho ba matšatsi a bo lehono ga ba sa tshepiša, motho a ka go tshepiša gore o tla lefela ditshwanelo ka morago ga matšatši, gomme matšatši a le a fetoga dikgwedi go ya mengwageng. Ke ka fao Moshifa a bonego go le kaone go nyaka mothuši gore a tle a kgone go sepetša taba tša gagwe tša mašeleng ga bonolo. Monna yoo o be a sa tšwafe go latelela motho ka ga gagwe a mokukela godimo le fase go fihlela a ntšha phefo ganong a goelela mmagwe. Ba rile ge ba goroga, senatla seo sa ba hlathollela ka mokgwa woo tša mašeleng di be go di sepela ka gona le ka moo bošaedi bo bego bo sa nyake ge ka gona gore ba tle ba kgone go šomišana ga botse le ngaka Moshifa yoo a bego a šetše a tsošitše badimo a goelela godimo e ke o bone sepoko.

Lopang o rile ge a tšwelela gona, Moshifa a tšitlagana fase mme mathwasana a gagwe kage a be a ba thwasišitše gabotse, ba tula moropa gore o tsebe moo o thomilego. Go se go ye kae morago ga go kgogišiwa motšoko wa thekgwana, Moshifa a ethimola mahlo a gagwe a bile a etšwa megokgo e le ge a tseparetše Lopang ka mahlong.

Vumani vo, ngithi vumani vo a realo ka lentšu la makgwakgwa le kwagala e ke le gapeletšwa go tšwa mogolong. Moshifa o rile go wetša ditaola fase legogwaneng la tšona, a napa a thoma go diphekola. O rile go di hlola a dihlodišiša leboelela tša mmontšha gore yoo Lopang o tshwenywa ke mokgekolo yoo ba motheeletšego ka yena e lego mmelega kokwagwe. Segolo thata ge a dihlaloša e be e le gore makgolokhukhu wa Lopang o be a nyaka go mofa bongaka kage a molemogile gore o na le tlhokomelo le šedi. Seo se ile sa napa sa hlaloša ditoro toro tšeo di bego di mo hlomere ka matšatši. Batswadi ba gagwe ba ile ba re ehu ge ba ekwa tlhalošo yeo ba kwešiša gore yoo morwedi wa bona o tlaka a khutša gomme le yena bjalo ka thaka tša gagwe, a ipshina ka boroko. Lopang o be a šetše a fedile dinama ka baka la go se robale boroko makga a mmalwa. Ge e le mmago Lopang yena o be a bile a segela ka thamong a kgahlilwe ke ditaba tšeo di boletšwego ke Moshifa a be a botšiša gore a ngaka a kgona go ba thwasišetša yoo Lopang gore a tle a kgone go phethagatša seo badimo ba senyakago. Mahlo a Lopang a be a šetše a tletše megokgo ya letšhogo a bile a gagaba mo fase a kgotsa gore a therešo o