DIT is ’n gewone kronkelende plaaspad. Weerskante staan die geel grasveld heuphoogte. Die plaashek swaai oop en groot bome gooi koel skadu’s oor die werf.
Op die oog af lyk Noble House, die plaas van oudregter Fred Beckley (79), soos baie ander plase hier aan die buitewyke van die Rosestad. En ja, sy bonsmarabeeste is indrukwekkend. Maar dis nie waarom ons hier is nie.
Benewens die stilte en die uitgestrekte goudgeel vlaktes wat lafenis vir ’n tam siel kan bring, is hierdie plaas ook ’n paradys vir petrolkoppe.