E noho ana ahau ki tōku taumata whakamarumaru o Ngōngōtahā, taka rawa iho ngā wai o Utuhina, e piri nei ki te taha o Pukeroa Oruawhata. Ka huri taku titiro ki Tiheia, e aru kōrikoriko ana ngā wai ō Awahou. E ai rā taku titiro ki nga wai karekare i a Rotorua-nui-a-Kahu. Nō reira, piki mai, kake mai rā! Hōmai te waiora ki a ahau kia tūtakitaki waiora, tūtakitaki nahanaha mai e! Whakaamohia te ao ki uta, whakangāwaritia te ao ki tai! Kei ngā kākahi whakairoiro, kei ngā rake pīngao, huri noa, huri noa, nau mai, haere mai, whakatau mai rā! Whakatau mai rā ki runga i te ki ā ngā mātua tupuna: nō te hōhonutanga ō Te Korokoro ō Te Parata, nō Te Whare Hukahukanui ā Tangaroa, ka puta, ka ora ai te waka kaitā, te waka roa, te waka takere nui ko Te Arawa tērā! Nō ngā waikarekare ā Te Arawa i kawea mai ōku tūpuna, ōku mātua, ā, heke iho mai ki tēnei pīpī manu mākarokaro, tēnei ihu hūpē nei. Nō reira, ka tupu ki roto, ka tupu ki waho, ka tupu ki te wheiao ki te ao mārama! He whakatakotoranga ōpaki, kupu pakupaku ēnei e waihanga ana i runga i ōku nei tirotiro haerehanga atu ki te takere ō taku ao whaihanga whare nei. Ka noho ngātahi ki taku whao, he ao hou kei tua e tūmanakonuitia ana e tātou. Nō reira, me whiria te taura here tangata, whiri iwitunatia, kia purutia ai tātou katoa. Ko te urupounamu a Te Arawa nei e mea ana, mā te aha ka rongo te wai ki te aroha o te tangata? Ā kāti, e pātōtō ana te iwi kaihoahoa i runga i te whatitoka o te whare māramatanga? Anā, mā te whakatakoto tūāpapa Māori e whakarauora tonu ai te piringa kei waenganui i ā tātou! Nō reira, hou mai, kuhu mai, tomo mai! Tihei mauri ora!
own, after reaching maximum frustration with how projects and anything to do with te ao
