DIE HONDE IN DIE VOORSTE LINIES
Die jaar 2020 sal vir baie dinge onthou word, hoofsaaklik vir Covid-19 en die impak wat dit op die wêreld gehad het, insluitend die jagbedryf in Suid-Afrika. Dit was ook die jaar wat ’n paar bekendes ons verlaat het en een van dié bekendes wat ons moes groet, het vier bene, groot ore en ’n dodelike reuksintuig gehad. K9 Killer was seker Suid-Afrika se bekendste teenstropingsheld. Hy was een van die eerste drie honde wat in die Nasionale Krugerwildtuin ontplooi is om stropers te vang. Saam met Ngwenya, sy suster, en Loco het dié drie Belgiese malinois-honde honderde stropers vasgetrek.
