NOAG WAS ’N AMAZING OU
Verlede naweek sit en droom ek daar op ’n rots langs Bettiesbaai se hawe, heel rustig en tevrede in die loom oggendsonnetjie.
Tot ’n familie daar aankom met ’n rubberboot wat hulle te water laat om tussen die bruin bamboeskoppe mee te gaan hengel, seker maar vir hottentot of rooi roman. Pa en seun en dogter klim in en kry die enjintjie aan die gang, ma bly op die kaai agter met die Jack Russel, wat benoud aan die blaf gaan toe sy mense die see in vaar.
