Ditswakotleng
By Tseliso Leballo and Mosololi Mohapi
()
About this ebook
A collection of Sesotho poetry by Tseliso Leballo and Mosololi Mohapi. Mookodi wa dithothokiso tse bopang bophelo. Sediba sa tsebo le dikeletso. Utlwa ha sethothokisi se phafa dikgabane tse kang Kaizer Motaung le Nelson Rholihlahla Mandela. Mamela ha se ntsha mabinabine a pelo se bua ka dikgapha, se roka thatohatsi ya kgomo, se roka nakedi, se bua ka lefatshe, tsela e yang badimong le motsana wa habo sona. Utlwa molodi wa puo ya bothothokisi e phephetsang e hlabolla kelello. Bongodi bo hlwahlwa, bokgabane ba puo le modiko wa tlotlontswe.
Reviews for Ditswakotleng
0 ratings0 reviews
Book preview
Ditswakotleng - Tseliso Leballo
1. Afrika Borwa e ntjha
Kgale le benya batho re fetlama,
Batho re fetlama le thwathwaretsa,
Le thwathwaretsa le kirietsa batho re tshaba,
Batho re tshaba re matha patlaka,
Re matha lebelo re matha mokoka.
Batho kgale re mamella maima, mathata,
Batho kgale re mamella ditsietsi, mahlomola,
Tshusutlello e le bohobe ba letsatsi,
Tlhekefetso e le metsi a ka mehla,
Mahlomola e le selallo sa ka mehla.
Batho re le metwaitwai fatsheng la bontata rona,
Batho re le bothuube naheng ya habo rona
Re jela kgwebeleng jwalo ka maeba naheng ya habo rona,
Re phela mekoting le dithakadi fatsheng la habo rona,
Re tsekisana maphao le diphokojwe naheng ya habo rona.
Batho re le metwaitwai re twaila,
Batho re le bohloma o hlomolle sebele,
Bohloma o hlomolle thuube ha e na tsatsa,
Morao topo re siile diphiphitha, ditutudu,
Morao matlo re siile masupi, dithako.
Nyene le bosiu batho re sa bo hlothe re hlobaela,
Re sa bo hlothe re ngwanyamiswa sa mebutla,
Re matha la Ntshwekge dimo la kgale,
Dikulo ka morao e le lethala, mohoula,
Dikulo ka morao lethwathwarathwara.
Batho re ilwa sekgethe re kgethollwa,
Re kgethollwa re kgahlapetswa sebele
Re kgeswa re kotelwa sa manamane,
Fiswaneng le le leng re sa nwele,
Janeng se le seng re sa jele.
Nyene le bosiu boko e le sa phohomela,
Boko e le sa phohomela, pakamahlamola,
Sello sa masea se kupulla mabitla,
Batswetse ba phoka dikulo ka matsoho
Madi a masea a ba qaphaletsa difahleho.
Tshweu le Rantsho ba qothisana lehlokwa,
Ba qothisana lehlokwa ba tseka naha,
Ba tseka naha ba tseka borena,
Ba lwana kgakgaulane molamu wa tshepe,
Ba lwana sedutse ya sedula matswapong.
Bashanyana marole a matjha
Ba tela menate ba kgetha ntwa,
Bananyana thope tse moropotsana
Ba tela bophelo ba kgetha lefu,
Ba kgetha lefu ba lwanela toka.
Pelo di tjhobatjhoba di llela kgotso,
Di llela kgotso di llela tokoloho,
Pelo di labalaba di batla kutlwano,
Di batla kutlwano di batla poelano,
Tokoloho le poelano e le sona sello.
Ha thwasa lemo sa monyaka sa thabo,
Ha thwasa kgwedi ya Mmesa tlisathabo,
Basadi ba e hlaba ba e palaola medidietsane,
Medidietsane ya lopalla sebakeng,
Banna ba o dumela mokorotlo.
Meokgo ya thabo ya tsorotla difahlenong,
Masodi a thabo a theoha marameng,
Keledi tsa nyakallo tsa rotha mahlong,
Kajeno ho tjhabile la monyaka le thabo,
La monyaka le kgotso Afrika-Borwa.
Kajeno Tshweu le Rantsho ke metswalle,
Kajeno Tshweu le Rantsho ke diphathakalle,
Ba bina kgotso ba bua poelano,
Ba bua poelano ba bua kutlwano,
Ke majammoho bana ba lesafo.
Monongwaha batho ba robala boroko,
Maphao, mesima ke tsa maoba,
Sabole di dilateng ho rena kgotso,
Dithunya le dikanono di tletse mafome,
Afrika-Borwa ho rena kgotso le nala.
Afrika-Borwa o motle o kgabile,
O motle o kgabile o a kgahleha,
O kgahla batho matshweletshwele,
O phutha batho ditjhabatjhaba,
Fubeng sa hao ba anya mofuthu, lerato.
2. Pelesadibe
Ngwana hlaba sa lehodimo konyana,
Konyana ya qhoweng habo mangeloi,
Mangeloi boKgabariele teduputswa,
Kgosi ya dikgosi, morena wa marena,
Kgosi seratwa ke bafo le marena.
Konyana ya ho tsejwa ka meeka, mehlolo,
Konyana ya ho tsejwa ka mabitso bongata,
Mabitso ke bala bongata, sehlopha,
Nka a bala bongata ka qeta letsoho,
Nka a bala bongata ka tshela letsoho.
Ngwana o dikadikwe sa letsatsi hloohong,
Ngwana o dikadikwe sa kgwedi sefubeng,
Konyana e dikadikwe sa dinaledi pelong,
Konyana e dikadikwe sa mookodi phatleng,
Konyana e tshwao la sefapano pakakgotso.
Mohlang a lesang ba ntatae borena,
Mohlang a theohang sa lehodimo setulo,
Pitso ha na eptjwa ya kgorolakoqo sebele,
Ha bitswa mangeloi boMoikaele batshepuwa,
Konyana ya tela mofuthu wa lehodimo.
Mohla e hlahang namane ya Juda,
Mohla se fihlang lefatsheng bata se maro,
Fatshe la na la reketla la thothomela,
Mahodimo a kirietsa a thwatharetsa,
Mahodimo a buleha ya na ditlwebelele.
Ngwana