Thotana E Se Nang Khudutlou

By Tsietsi S. Maselwa, Sr

THOTANA
e se nang
KHUDUTLOU

Thotana e e senang khudutlou ke dikgankhutswe di le supa tse mokwadi a anelang ka ditiragalo tsa segompieno.E na le dipotso mo bokhutlong jwa khutswe nngwe le nngwe tse di ka dirisiwang jaaka tekatlhaloganyo.

1.Panakase o boela.
Kgalema lenyatso mosimane wa Motshweneng.
2.Maikwatlhao ke namane ya morago.
Isago e e phatsimang e baakanyetswa go sa le gale.
3.Go rothisa mmutla madi mmogo le Ga itsiwe e se naga.
Sephiri se atle se nne le ditlamorago tse di botlhoko!
4.Moremogolo go betlwa wa taola.......
wa motho wa ipetla,Kediemetse wa ponto le sheleng (Nkgwana ya bojalwa) a fetoga go nna Mmamoruti.
6.Sakana itsamaele
O tshabe motho!!
7.Gadikae
Tsa kamoso ga di itsiwe mogaetsho

• Language: Southern sotho
• Publisher: Tsietsi S. Maselwa, Sr
• Release date: Sep 7, 2016
• ISBN: 9781370742493

Book preview

Pakanase o boela gae

Maikwatlhao ke namane ya morago

Go rothisa mmutla madi

Ga a itsiwe e se naga

Moremogolo go betlwa wa taola

Sakana, itsamaele

Gadikae

Ka ga mokwadi

Dikgangkhutshwe tsa Setswana

1. Pakanase o boela gae

2. Maikwatlhao ke namane ya morago

3. Go rothisa mmutla madi

4. Ga a itsewe e se naga

5. Moremogolo go betlwa wa taola

6. Sakana, itsamaele

7. Gadikae

- 1 -

Pakanase O Boela Gae

Lwetse ke kgwedi e e bothitho, mogaetsho. Ke nako eo maru a simololang go kokoana mo loaping mme Batswana ba re a a lwala, a batla go nesa pula. Ee, ke ka moo kgwedi e e bidiwang Lwetse ka e le go lwala ga maru. Nako e ne e ka nna ura ya bobedi mo tshokologong ya letsatsi la Labotlhano fa tekisi e ne e ema gaufi le setlhare sa mokgalo mo motseng wa Tlapeng. Motsana o montlenyana o monnye magareng ga torotswana ya Pampierstad le motse o mogolo wa Motsweding.

E rile e ise e eme sentle ke fa a setse a itatlhetse kwa ntle mosimane wa Motshweneng. A batla a wela fa fatshe mme a kgona go itsetsepela. A itaaganya morwalo wa gagwe fa fatse pele a khubama go suna mmu fa fatshe. Se e le go tlotla mmu o borraagwemogolo ba letseng mo go ona le go leboga badimo gore a bo a fitlhile kwa ntle ga matsapa. O ne a sale a tsamaile dikgwedi di le nne tse di fetileng go ya go batlana le tiro. O ne a fitlha jalo ka kgwedi ya Lwetse e le motho yo mošwa.

Moriri wa gagwe o ne o le boleta e bile o kametswe kwa morago. Ditlhako a rwele tse ditshweu e bile di le motswi kwa pele e ka re di ka tlhaba motho. Borukgwe e le jo bohibidu jo bo neng bo na le dikgetse di le thataro; tse pedi fa pele le tse pedi fa morago. Tse pedi tsa bofelo di ne le golo gogwe go ya kwa tlase ga mangole. Borukgwe jwa gagwe bo ne bo khurumetsa ditlhako e bile bo feta bo goga mmu fa a tsamaya. Fa a fetileng gona o ne a tlogela motlhala e ka re wa sebokolodi. Hempe o ne a apere e e serolwane e e matsogo a maleele, kholoro ya yona e emeletse e bile e mo tswetswe ditsebe. O ne a rwele hutse e e botala jwa legodimo e bile e na le diphuka tse tharo fa pele. Diphuka tse di ne di le mebala e mentle e ka re ke tsa phikoko. O ne a tsentse mabanta a a fa a; ao a golegelwang mo borukgweng fa pele mme a tsamaye fa godimo ga magetla pele a tshwara borukgwe gape ka kwa morago.

A tsaya morwalo wa gagwe a o belega mme a simolola go tsamaya. O ne a tsamaya ka bonya e bile a sa tsamaye a tlhamaletse. E ne e re fa a tsamaya tlhogo ya bo e sekametse kwa mojeng. Mmele wa gagwe o ne o sekamela kwa moragonyana mme sehuba se tswele kwa ntle. A tsamaya ka matsetseleko tota.

E rile a ise a tsamaye sebaka Teledimo tsala ya gagwe ya tlhogo ya kgomo a mmona mme a tlhaga a tabogile go mo kgatlhantsha. Kana e ne e le dikgwedi di le mokawana a ntse a sa bone Pakanase morago ga gore a tswe ka motse go ya go batlana le tiro. E rile a re o tla dumedisa ke fa Pakanase a mo sukunyetsa segwapa mo ganong. Boemong jwa go dumedisa, Teledimo a nnela go sila segwapa ka meno. Letswai la sona le ne le le monate moo moeka a neng a lebala gotlhelele gore maikaelelo a gagwe e ne e le go dumedisa tsala ya gagwe mme a mmotse matsogo. A phamola morwalo mo go ena a ntse a sila segwapa jalo, a metsa mathe a sa fetse.

Monate wa sona o ne o tsamaya le ditshika tsa gagwe tsa thamo. Go babanyana ga sona go ne go dira gore e ka re a ka tla a ntse a tlolatlola. Ka se ne se baba thata, lemina le ne le tla le ntse le elela mo nkong ya gagwe ya molema. A utlwa tlhogo ya gagwe e baba. Ee, mogaetsho, Teledimo o ne a lemoga tsala ya gagwe ka diaparo tseo a neng a di apere le ka motsamao wa gagwe o o neng o fetogile gore kwa a tswang gona botshelo bo ntse bo mo tsamaela sentle.

Fa a ne a metsa segwapa ke fa ba setse ba atametse legora la kwa ga Mmakehilwe mme bobedi jwa fapogela gona. E rile go tsena ba fitlhela banna ba tsentse ditlhogo ba buisa phafana. Ba ne ba ntsha ditlhogo ka gagwe ka ntlha ya go makala. Lefatshe le na le metlholo ruri! ‘A ke ene Pakanase morwa Kedumetse?’ Ga botsa monna mongwe ka go makala. Banna botlhe ba palelwa ke go araba mme ba sala ba rototse matlho. Ba makaletse lekau le lentle le, ena mosimane yo